Masjid Qurtaba History Urdu Qurtaba Mosque In Urdu Information
Undlus main Islami hakumat ki dastan 8 sadiyon par phaili hui hai. Dunya jab jahalat ke andhairon main gote kha rahi thi, is waqt ka mazhab taren muwashira yani europe jab ilam o alim se be bahra tha. Tab andlus main ilam ke liye nae bab khul rahe the. Saikron kutub khane jin main lakhon kutub maujood thi. Kartaba main maujood the. Tib, jarahat, chemia, hadis, fika, riyazi aur aj ki jadid science ke tamam awam ki bunyad andlus main dali gai. Is waqt ki maloom dunya main andlus ilam ke hawale se sab se zar khaiz khita mana jata tha. Dunya jahan se tashnagan ilam yahan puhnchte the. Aur phir yahan koi ek tahzeeb ke afrad nahin balke mutad kism ke afrad the jinko akhowat o masawat ka sabak musalmano ne parhaya aur wo aise ek hue ke dunya ki sab se taraki yafta qoum ban kar ubhre. 8so baras main Islami hakumat ne urooj o zawal ke kai safar tai kiye aur phir safa undlus se aise mit gai jaise kabhi thi hi nahin.
Undlus ki tarikh aisi tarikh hai jo kisi bhi musalman ki ankhain nam kiye bina mukamal nahin hoti. Aj waha maujood islami fan tameer ke shahkar hi hain jinki mojoodgi agyar ko ye sochne par majbur kardeti hai ke jo qoum aj khizan ka shikar hai is ki bahar bohat shandar thi. Kartaba main jamia kartaba se lekar garnata main akhri Islami hasar ul hamra tak aj spain jane wale dekh kar dang rah jate hen ke ye kaisi qoum thi ke jahan se bhi guzri apna nishan chorgai. Jamia kartaba islami aur dunyae fan tameer ka ek shahkar hai lekin bad kismati hai ke jo masjid ilam ka markaz thi jo mah ramzan main sitaron ki tarah jagmagati thi wo ab sadiyon se hurf azan ko taras rahi hai. Wahan musalmano ko sajde ki ijazat nahin. Jamia kartaba ki tameer abdul rahman dakhil ne 8 sadi ke awakhir main shuru ki, wadi al kabeer main darya ke pul par is jaga tameer ki gai jaha saint o wansant ka garja maujood tha.
Is ka khuch hisa to pehle hi musalman masjid ke tor par istamal kar rahe the lekin masjid ki tameer ke liye musalmano ne baki garja hasil karne ki khuwaish zahir ki. Tamam tar behtar bartao ke bawajood bhi esai is par tayar na hue. Abdul rahman ul dakhil ne bohat bhari keemat ada karke baki girja bhi esaiyon se khared lia. Masjid ki tameer ka kam shuru hua to ameer abdul rahman ne khud kam ki nigrani ki tameer main zok o shok ka andaza is bat se lagaya jasakta hai ke aisi shahkar masjid sirf do baras ke kalil arse main tayar hui. Is waqt jamia kartaba ki tameer par 80 hazar dinar kharch hue the. Deewarain is kadar buland thi ke dor se shahar ki fasil malum hoti thi 36 feet ki bulandi par tameer ki gai aur yu hawa aur roshni ka behtar nakas mumkan hua. Chat ko sahara daine ke liye kai satoon ki kasrat se masjid main khud ba khud raste bangae. Har satoon par dohri nali mahrabain nasb ki gai jo baad mein Undlus ke fan tameer ka hisa bani. Har dusri mahrab ko pehli mahrab ke uper aise nasb kia gaya ke wo chat se ja mili. Chat main do so isi sitare nasb kiye gae jin main se wo sitare jo andruni dalan main nasb kiye gae, khalis chandi ke the. Markazi hal main ek bohat bara jahaz nasb kia gaya tha jin main bek waqt ek hazar chirag roshan hote the. Masjid main nasb satoon zayada tar ashbilia, arbona aur kartajina se mangae gae lekin wo mustakbil ki zaruriyat ke liye tadad main bohat kam the lehaza abdul rahman nasir ne bad main andulsi sang mar mar ko tarshawa kar satoon tayar karwae.
Sang-e-mar mar tarashwane ke bad inko sone aur jawarat se mazen kia gaya, ye sara kam nihayat nafasat ke sath anjam dia gaya. Majmui tor satoon ki tadad 1400thi. Masjid main shuru shuru main 9 darwaze nasb kiye gae jo bad main 21 tak puhnch gae in main se 9 darwaze mashrik ki janib aur no hi magrib ki janib nasb kiye gae, dono Janib 8 darwaze mardon ke liye jabke ek ek darwaza khawateen ke liye makhsus tha. Shumal ki janib 3 darwaze the jin par petal tasab tha jo suraj ki roshni main jagmaga uthta tha. Janob main kasar khilafat se milne ke liye bhi sone ka ek darwaza maujood tha. Hisham awal ne masjid main ek minar tameer karwaya jis par jane ke liye ek zena maujood tha. Ye minar bad main ek zilzile ki waja se toot phot ka shikar hogaya. Bad main abdul rahman nasir ne is minar ki jaga naya minar tayar karwaya jis par jane ke liye do zene banae gae. Is minar par ek kalas banaya gaya jiski shakal 3 saibon se milti thi. In main se ek saib chandi baki do sone ke the. Saibon ke uper sosan ka ek phool banaya gaya jis par ek sone ka anar banaya gaya. Baz riwayat ke mutabik is minar ki onchai 72 hath thi. Aur isi minar ke mozan azan deta tha. Masjid main khas dekhne ki chez waha banaya gaya manbar tha. Sath hi masjid ke andar maujood Mahrab bhi masjid ki khobsurti main bohat izafa karte the. Tamam satoono par jaise pehle bayan hua dohri mahrabain nasb thi aur har satoon aisa lagta tha jaise khajoor ka darakht ho. Satoon khajoor ke tane ki manid tha jabke mahrabain khajoor ki tahniyo ki manid nazar ati thi. Manbar keliye jis sang mar mar ka istamal hua wo dodh se zayada safaid aur nihayat ujla tha.
Samne ki janib koos ki shakal main ek mahrab banai gai jiske dono itraf do, do satoon the jin main ek surkh aur ek neela tha. Kabla ki deewar ke sath jo darwaza sabta yani kasar khilafat ki guzar gah ki janib maujood tha wo khushboo dar lakri ke tukron ko jorne ke liye sone aur chandi ke keel istamal kiye gae. Masjid main roshni ke liye istamal hone wale chiragon ki durust tadad ka koi andaza nahin. Ek riwayat ke mutabik inki tadad sadhe 7 hazar se zayada thi. Roshni ka intezam is kadar behtar tha ke rat ke waqt bhi din ka guman hota tha. Sadhe 3 man mom aur 3 so man tail sal bhar main istamal kia jata tha. Masjid ek khubsurat shahkar thi iski khubsurti ka andaza is bat se laga len ke waha nas raniyon ki maujoodgi ke bawjood kabhi kalisa banane ki himayat nahin ki gai. Nasrani kahte the ke agar kalsa banaya gaya to masjid ka husun kharab hokar rahjaega.
Baad mein arch bashap ne is faisle ki mukhalfat karte hue wahan kalisa ki tameer ka hukam diya. Tameer mukamal hone ke bad isne jab masjid ki sair ki to tasuf ke sath kehne laga ke agar mujhe maloom hota ke masjid itni haseen hai to kabhi kalisa ki tameer ki ijazat na deta ye riyat aj bhi kartaba ke muncipal hal main maujood hai. Aaj 800 baras beet gaye aur baqol iqbal "ah ke sadiyon se hai teri fiza be azan" wahan aaj tak Allahu Akbar ki sadayain goonji. Woh minar aur uska burj ab bhi kisi mozan ka intezar karte hain ye tab ki baat hai jab sultan saood ne bispania ka sarkari dora kiya. Protocol Main maujood afsaran se namaz ki ijazat chahi to inhon ne mazrat ki ke masjid ab kalisa main tabdeel hochuki hai. Sultan ka chehra gushe se tamtama utha aur inhon ne jawab dia "main is Rasool ki umat se hon jis ne nasraniyon ke wafad ko masjid nabvi main ibadat karne ki ijazat di aur tum mujhe apni masjid main namaz ada karne se rokte ho?" phir sultan ne azan dene ka hukam dia aur yu sadiyon bad kartaba ki fiza Allahu Akbar se goonjh uthi. Aaj wahan kalisa maujood hai, ijazat mangne par bhi musalmano ko namaz ki adaigi se roka jata hai. Ek bar waha namaz ada karne walon ko sazain bhi hochuki hain. 1931 main Allama iqbal ne waha 800 sal bad namaz ada ki thi ab phir wohi khamoshi kaim hai. Musalman wahan se aise mit gae jaise the hi nahin. 800 baras par mushtamil ye dastan apne andar kai kahaniyan liye hue hai. Musalman in halat ko kaise puhnche ye ek alag dastan hai.
No comments:
Post a Comment