Wednesday, July 20, 2016

Hiroshima History In Urdu Hiroshima And Nagasaki Atom Bomb Documentary In Hindi Information

Lal Gulab     6:56 AM     No comments

Hiroshima Par Atomi Hamlay Ki Ajeeb Daastaan Jis Mein 2 Lakh Se Zayada Log Luqmah Ajal Banay.



Hiroshima History In Urdu Hiroshima And Nagasaki Documentary In Hindi: Jung-e-azeem doyam
ke shuru mein hiroshima mein abadi 3 laakh 81 hazaar thi lekin chunkay yeh fouji saz-o-samaan ki pedawar ka aik ahem shehar tha is liye Japani fouj ne barray pemanay par aam shehrion ka inkhilah kiya aur hamlay ke waqt yahan par abadi ka andaza 2 laakh 55 hazar lagaya gaya hai.

America ne manhattan mansoobay ke tehat jis atom bomb par tahaqeeq ki thi us mein Bartania aur Canada ka ishtiraaq bhi tha. Is mansoobay ke tehat America, atomi asleha ka tajurbah 16 july 1945 ko New Mexico mein triniti par kar chuka tha aur ab is ke amli istemaal ka hatmi faisla kar liya gaya tha.

Yeh 6 august ki subah thi aur hiroshima ke awam chand lamhon baad anay wali dard naak qayamat se be khabar uthney ki tayari kar rahay they unhen maloom nahi tha ke America ka B-29 nami jangi jahaz jo un ke liye mout ka pegham le kar araha hai woh tenyaan jazeeray ke hawai aday se apni uraan bhar chuka hai. Is tayaray ki hifazat ke liye 2 mazeed tayaray hamrah they jinhon ne Japani fazaiya ke kisi hamlay se bachao ke liye iqdamaat karne they. Tayarah apni matlooba bulandi hasil kar chuka tha kyun ke pilot powell ke liye hukam tha ke shikaar ke qareeb pohanchnay se pehlay ki bulandi 31000 foot honi chahiye. Safar ke doran navy captain william aur un ke muawin ne atom bomb mein matlooba tabdeelian ki aur aakhir mein safety pin nikaal kar ussay hamlay ke liye mukammal tor par tayyar kar liya tha.

Hiroshima tak pohanchte pohanchte subah ho gayi thi aur suraj nikal chuka tha. Subah 8 bajay ke qareeb hiroshima ke radar operator ne itla di ke 3 tayaron par mushtamil aik chhota qaafla shehar ki janib barh raha hai. Chunkay Amreeci fazai bombari mein tayaron ke baray baray ghool urr kar hamla aawar hotay they is liye chand jahazon par koyi khaas tavaja nahin di gayi aur emergency khatam karne ka bataya aur waisay bhi bombari raat ko hoti thi aur ab raat ka andhera chaatt chuka tha is liye logon ne bay khatar ho kar mamool ke kaam kaaj shuru kar dainay thay.

Lekin tayarah un ke liye mout ka paigham ban kar chand lamhon mein unhein tabah kar dainay ke liye taqreeban pohanch chuka tha. Tayaray par lada howa 9700 pound wazni uranium se tayar karda little boy nami atom bomb hiroshima kya puri duniya mein tehelka macha dainay ke liye tayyar tha aur pilot apne maqsad ko hasil karne ke liye pur azam tha.

Subah ke 8 baj kar 15 minute they ke tayyaray se atom bomb, zameen ke rukh par chore diya gaya aur 43 second baad insani tareekh ka aik bohat bara dhamaka howa. Yeh itna bara dhamaka tha ke fiza mein 11 meel bulandi par urta hua jahaz hichkolay khanay laga. Shehar par dhuwan chhaa gaya kisi ko nah to kuch dikhai de raha tha aur na hi kuch samajh araha tha. Sub kuch sakht tapish se pighal chuka tha na to fiza mein parinday bachay aur na hi zameen par insan o hewan. Jahan bomb gira wahan ird gird aik mil ke dairay mein koI imarat mojood na rahi. Aag ke sholon ka aik aisa jhakar chalne laga jis ne shayad kisi ko zinda na chorney ka tahiya kiya hua tha. Aag ne shehar ka sarhay 4 meel tak ka ilaqa apni lapait mein liya hua tha. Chunkay sab kuch malyamait ho chuka tha lihaza radio aur telegraphic contact na honay ki wajah se khud Japan ke dosray ilaqon ko bhi maloom nahi tha ke un ke hum watan kis haal mein hain itni tabahi machi ke koi aah o baka karne wala bhi nahi tha.
Army control station ne hiroshima ke bays se rabtay ki jad-o-jehad ki lekin koi kamyabi hasil na hoi fouji qayadat ki samajh se sab kuch balatar tha ke na to koi bara fizai hamla hua hai aur na hi hiroshima mein gola barood ka itna bara zakheera tha jis se barri tabahi ka imkaan ho. Japani fazaiya ke aik staff officer ko hukam diya gaya ke woh tayara leker survey kare aur haqaiq maloom kar ke ittila de. Hiroshima par kya guzri hai yeh jan'nay ke liye tayarah taqreeban 100 meel dor faaslay se ura tha aur 3 ghanton tak musalsal parwaaz karta raha, lekin yeh tayyarah baghair kuch dekhe wapas aya aur apne aaqaon ko sirf yeh khabar de saka ke wahan siwaye baadalon aur dhowen ke kuch nazar nahin aya.

Tokyo mein Japan broad casting corporation ko yeh andaza ho gaya tha ke hiroshima ka radio station khamosh ho chuka hai. Unhon ne aik aur telephone line istemal karte hue rabta bahaal karne ki koshish ki magar be sood. Hiroshima se 10 meel dor railway station se reportein masool huien ke wahan aik barray dhamakay ki aawaz suُni gai hai taham tafseelaat maloom nahi theen. Isi terhan railway ke mehkame ne rail road telegraph ke band honay ki itla di.

Hiroshima par atom bomb ke hamlay ka ilm us waqt hua jub America ke sadar ka paigham washington dc ke muqami waqt ke mutabiq 6 august din 11 bujey radio par sunai dainay laga. Duniya ko 16 ghantay baad ilm howa ke America hiroshima par hamla kar chuka hai america ke sadar ne apne bayan mein kaha ke America ne Japani shehar hiroshima par naye bomb atom bomb se hamla kiya hai.

Aik mohtaat andazay ke mutabiq pehlay dhamakay aur taabkari se 70, 000 afraad mout ke mun mein ja chukay thay aur waqt guzarnay ke sath sath marnay walon ki tadaad aik laakh tak pohanch gyi aur agar cancer aur lambay arsay tak bemari ke baad marnay walon ko shaamil kiya jaye to ye tadaad 2 lakh tak banti hai.

Watch Full Hiroshima Documentary Movie In Urdu

Reactions: 
,

0 comments :

Like Us

Company

Legal Stuff

FAQ's

Blogroll

Subscribe to Newsletter

We'll never share your Email address.
© 2016 Urdu Roman Hindi English Site. Online content. Published By LalGulab.com.