Saturday, April 16, 2016

How To Earn Money On Youtube In Urdu Youtube Se Paise Kamane Ka Tarika Hindi

Lal Gulab     4:24 AM     No comments

How To Earn Money From Youtube In Urdu In Pakistan Make Money Youtube In India In Hindi:
Youtube Par Paise Kaise Kamaye Ghar Baithe: Lahore (LalGulab) Agar aap nojawan hain aur aap ke paas khuch free time hai tou apne tree time ko social media par muft mein kharch karne se behtar hai keh aap Youtube par khuch mufeed kaam karain jis se na sirf aap ko khuch amdani ho balkeh hamari internet society ko bhi faida ho. Is tarah muashray ki khidmat ke sath sath izafi amdani bhi ho sakti hai aur agar zayada sanjeedgi ke sath ye kaam karain tou nokri se zayada amdani bhi ho sakti hai.

Dunya mein bohat se log Youtube istemal kar ke lakhon dollars salana kama rahe hain. Ye log karte sirf ye hain keh munfarid tasawarat par mabni videos banate hain aur apne channels par upload kar dete hain. Sunnay mein sada aur asan lagta hai na? Sada aur asaan hai bhi ye kin logon ke liye faida mand hai? sub se pehle is wazahat ki zaroorat hai keh Youtube par har insan kaam kar sakta hai jis ko is ka shoq ho, lekin video mawad ki tayari aik mushkil marhala hai is liye ye un afrad ke liye zayada mozoon hai jo video ko batoor media istemal kar sakte hain maslan, takhleeq karon, teachers, students, video blogs, sahafi, artists aur singers waghera.

Youtube Ka Taruf - What Is Youtube
Is ke bare mein aap ko maloom hi ho ga keh ye dunya ki maqbool tareen video sharing website hai jis par koi bhi insan ya company apni video upload kar sakti hai, jabkeh koi bhi shakhs baghair kisi membership ke ye video dekh sakta hai. Youtube kisi bhi saraf se video nashar karne ya youtube par shaya shuda video dekhne ke liye koi fees nahin laita. Wese tou youtube 2005 mein qaim hoi lekin is ki asal taraqi us waqt hoi jub is ko dunya ke sub se bare search engine google ne 2006 mein khareed liya. Ab sawal ye paida hota hai keh jub google / youtube na tou dekhne wale se paise wasool kar rahi hai aur na hi video upload karne wale se tou youtube ke akhrajat kon ada karta hai? TV aur Newspapers ki tarah google aur youtube bhi advertisements se khoob munafa kamate hain. Yaad rahe keh google ko kul amdani ka 95% hisa ads se hasil hota hai. 

Youtube Se Paise Kamane Ka Tarika In Urdu 
  1. Youtube ka partnership programe
  2. Adsense hosted account
Youtube Partnership Programe
Is ke zariye youtube aap ki tayar karda  video se hone wali amdani ka khuch hisa aap ko deti hai. Is mein har aik ko shamil nahin kiya jata balkeh is ke khuch rules hain. Agar aap ki video mein jaan hai aur logon ki bari tadad us ko pasand karti hai tou aap ko youtube partnership programe mein shamil kiya jata hai jis se aap ko kafi maqool amdani ho sakti hai. Youtube ke is programe ke liye lazmi hai keh aap ki video mayari ho aur zayada se zayada nazreen ki dilchaspi se mutaliq ho takeh aap ke channel ko zayada se zayada log subscribe karain.

Adsense hosted account bohat se logon ko tou is cheez ka ilm ho ga lekin jin ko is ke bare mein ilm nahin un ke liye batana chahte hon keh koi bhi website ya blog site apni website par istiharat ki zumaidari google ke spurd kar deti hain jis par google apni marzi se ishtiharaat shaya karta hai aur un se jo amdani hoti hai usay google aur website ke darmiyan taqseem kiya jata hai. Aaj kal is ki sharah 32:68 hai yani har 100 dollar mein se 68 dollar website ko aur 32$ google mein taqseem hote hain. Google adsense se dunya bhar mein lakhon ki tadad mein websites munsalik hain. Khud Pakistan mein taqreeban tamam hi bari websites ki zayada tar amdani google adsense se hoti hai. Adsense ki aik aur qisam adsense hosted account hai jis mein youtube par video ke andar ads nashar hote hain jis se hasil hone wali amdani video upload karne wale aur google ke darmiyan aik khas sharah se taqseem hoti hai. Adsense hosted account ke bhi khuch rules hain agar aap google ki policies ke mutabiq kaam karte hain tou is se achi khasi mahana amdani hoti hai.
 
Youtube Channel Qaim Karna
Agar aap video ke shobay mein dilchaspi rakhte rakhte hain aur aap ki umar 18 saal se zayada hai tou aap youtube par apna zati channel qaim kar sakte hain jis ka tareeqa bohat asan hai. Sirf aik email address ki madad se aap apna channel shuru kar sakte hain. Youtube par channel banane ke bohat se faide hain jis mein is ka bilkul muft hona, is ka mashoor hona, taza videos ka khud kaar tareeqa se sarch engine mein shamil hona waghera shamil hain.

Kis Tarah Ki Videos Youtube Par Upload Karain?
Youtube ki taraf se registered account holders ko la mehdood videos nashar karne ki ijazat hoti hai, lekin is ki khuch sharait hain jin mein ye kisi ki ruswai ka baes na ho, fehsh na ho, copyright ki khilaf warzi na ho, yani aap ka apna ho, jaraim ki targheeb dene wala mawad na ho, waghera shamil hain.  Is ke ilawa aap apni pasand ka koi bhi mawad nashar kar sakte hain. Lekin sub se zaroori ye hai keh video aap ke nazreen ki dilchaspi ki ho warna na tou aap ka youtube channel maqbool ho ga aur na hi aap ko us se amdani ho gi. Is liye video ki tayari aur upload karne se pehle is taraf tawaja deni bohat zaroori hai keh is mein logon ki dilchaspi kaa koi na koi ansar lazmi ho. Apne channel par koi bhi video upload karne se pehle achi tarah youtube ke rules ka mutalia karain aur koi bhi aisi video upload na karain jo youtube ke programe aur policy ke khilaf ho warna aap ka channel ya adsense account band bhi ho sakta hai.

Video Ki Quality Ya Tayari

Video ki tayari karte waqt khuch bunyadi baton ka khayal rakhna bohat zaroori hai sub se bunyad baat tou ye hai keh is ki picture quality aur awaz achi quality ki ho. Aaj kal HD quality ki videos zayada maqbool hain.

Video Mukhtasir Ho

Social media par log aise mazameen aur videos nahin parhte aur dekhte jo zayada taweel hon, is liye is ki lambai munasib honi chahiye. Chand minute ki video tayar karna aur upload karna aap ke liye zayada asan ho ga aur nazreen bhi bore nahin hote.
Farigh rehne se khuch koshish karna zayada behtar hai zayada se zayada kya ho ga aap nakaam ho jayain ge aur koi amdani nahin ho gi lekin phir bhi aap bohat khuch seekh chuke hon ge kehte hain "Jazba manand pare baghair aik nakami se dusri nakami tak jane ka naam hi kamyabi hai."

Reactions: 
,

0 comments :

Like Us

Company

Legal Stuff

FAQ's

Blogroll

Subscribe to Newsletter

We'll never share your Email address.
© 2016 Urdu Roman Hindi English Site. Online content. Published By LalGulab.com.